Blekkingarprjón í sinni einföldustu mynd

Eins og ég lofaði á facebooksíðu Prjónakistunnar ætla ég að kynna blekkingarprjón með því að leggja fram nokkur verkefni. Í þessu fyrsta verkefni prjónar þú einfalt stykki sem hjálpar þér til að skilja eðli blekkingarprjóns. Stykkið byrjar og endar á hefðbundu garðaprjóni en í miðjunni er flötur sem prjónaður er með einföldu blekkingarprjóni. Með því að bera sama þessa fleti þegar þú hefur lokið við að prjóna þá sérðu hversu mikill munur er á flötunum.

Í verkefnið notar þú tvo liti af garni. Í uppskriftinni er talað um ljósan og dökkan lit en þú getur valið hvað lit sem þú vilt. Reyndu bara að hafa þá vel aðgreinanlega. Veldu garn sem ekki er loðið eða misgróft. Í prjónles sem ekki á að ganga í getur akríl garn reynst vel.

 Prjónarnir sem þú notar til að prjóna stykkið ættu að vera ½ til 1 númeri minni en þú myndir vanalega prjóna sama garn með. Það er fallegra að prjóna þetta prjón þétt en laust.

Hver umferð á munsturmyndinni táknar einn garð. Þótt svo að einn garður séu tvær sléttar umferðir sem prjónaðar eru fram og til baka er aðeins ein umferð notuð til að sýna garðinn. Þetta er vegna þess að fyrri umferðin er alltaf prjónuð slétt en í seinni umferðinni er munstrið prjónað. 

Litaður flötur í munstrinu táknar að prjónað er slétt prjón (sem myndar garð á réttunni) en hvítur flötur er prjónaður brugðinn í þeim lit sem verið er að prjóna með.

Til að auðvelda þér að prjóna munstrið er gott að nota prjónamerki sem sett eru á prjónana með 10 lykkju millibili, þar sem rauða röndin er í munstrinu. Prjónamerki eru sérstaklega nauðsynleg þegar farið er að prjóna flóknari munstur.

Þú átt að prjóna eftir munsturteikningu. Hún er ekki flókin. Til að útskýra munstið svolítið fyrirfram má segja að fyrst séu tíu umferðir með hefðbundnu tvílitu garðaprjóni. Þá taki við tíu umferðir sem mynda einlita ferninga í miðjunni. Loks eru prjónaðar tíu umferðir með hefðbundnu garðaprjóni. 

Að loknu prjóninu má sjá nokkuð reglulegar rendur þegar horft er á stykkið frá hlið. Taktu eftir að í miðjunni virka dökku rendurnar með sléttu lykkjunum dekkri en garðurinn í miðjunni. Þegar þú snýrð prufunni og skiptir um sjónarhorn sérðu fimm fleti með þremur litum eða litaafbrigðum. Sléttir fletir hverfa og aðeins garðarnir sjást enda standa þeir uppúr stykkinu. 

Þeir sem vilja gera eitthvað meira með prufuna geta vissulega nýtt hana t.d. í pottalepp eða jafnvel púða með því að prjóna eða sauma kant á hana. Einnig væri hægt að prjóna fjórar svona prufur í mismunandi litum, sauma saman og nota sem púðaborð.

1. verkefni

1. garður: Fitjaðu upp 30 lykkjur með dekkri litnum. Snúðu við. Við það að fitja upp myndast fyrsti garðurinn svo ekki þarf að prjóna til baka.

2. garður: Prjónaðu með ljósari garðaprjón með ljósari litnum, slétt prjón er prjónað fram og til baka. 

3. garður- 10.garður: Allar þessar umferðir eru prjónaðar með garðaprjóni, 1 í hvorum lit samkvæmt teikningu.

11. garður: Prjónaðu með dekkri litnum: 1 slétt umferð. Snúðu við og prjónaðu 10 sléttar lykkjur, 10 brugðnar, 10 sléttar.

12. garður: Prjónaðu með ljósari litnum: 1 slétt umferð. Snúðu við og prjónaðu 10 brugðnar lykkjur, 10 sléttar, 10 brugðnar.

13. garður – 19 garður eru endurtekning á 11. og 12. garði sbr. mynd.

20. garður. Prjónaðu 1 slétta umferð. Snúðu við og felltu af.

Í prufunni eru dökkir fletir í munstrinu prjónaðir með grænu en þeir ljósu með bláu.
  

 

Prjónaskapurinn - vikur 1 og 2

Nú eru fyrstu tvær vikur ársin að baki og allt er að byrja að ganga sinn vana gang. Skólinn er byrjaður og undirbúningur fyrir önnina búinn að vera á fullu. En á milli þess sem ég er í vinnunni get ég þó prjónað eitthvað.

Fyrst fannst mér að ég hefði ekkert prjónað af viti þessar vikur en þegar betur er að gáð hefur þó eitthvað gerst. Ég hef nefnilega prjónað eina sokka fjögur sjöl og einn kraga.

Fyrst byrjaði ég á að prjóna lopasokka á krakka. Ég valdi mér svartan lopa þar sem hann var við hendina og tvo gráa liti með. Þar sem lopi er ekki hentugur upp á endinguna ákvað ég að prjóna hælinn tvöfaldan og hafa munstur á framleistanum til að sokkarnir yrðu tvöfaldir þar og entust örlítið lengur.

 
Þegar sokkarnir voru klárir byrjaði ég sjalaprjónið. Fyrst prjónaði ég Vinkonusjal úr svörtu garni með glitþræði og mislitum krulluþráðum. Þegar blúndan var tilbúin rúllaði ég henni upp í blóm og tók mynd.

Svo aðra þegar sjalið sjálft var tilbúið. Erfitt reyndist að mynda sjalið við þau birtuskilyrði sem voru vegna glitþráðarins. Ég verð að viðurkenna að ég var ekki alveg nógu ánægð með útkomun á sjalinu með þessu garni þar sem einn þráðurinn í garninu, sá litskipti, er krullaður og kemur ekki nógu vel út í garðaprjóni.

Þegar því var lokið skellti ég mér í annað Vinkonusjal og nú prjónaði ég úr Léttlopa sem Valdís vinkona mín litaði. Þar sem ég var ekki með nægilega mikinn lopa í heilt sjal ákvað ég að bæta inn í hann mórauðum lopa með óreglulegu millibili. Útkoman var flott þótt þessi litirnir í sjalinu séu kannski ekki þeir sem ég gæti klæðst. En ég hlýt að finna  vinkonu sem vill fá sjalið.

Svo fór ég að gera tilraunir með litgörótta ull og prjónaði tvö sjöl. Fyrst prjónaði ég sjal sem var með mjög mörgum litum.

Síðan annað með færri litum. Uppskriftin er ennþá í vinnslu hjá mér og því læt ég duga að setja aðeins myndir hér sem sýna litina í sjalinu en sleppi myndum af sjalinu sjálfu þótt ég sé í rauninni miklu ánægðari með þær en þessar.

Myndir af kraganum sem ég prjónaði geymi ég til betri tíma. 

Svo eins og áður, ef þú vilt gleðja mig þá kvittaðu hér fyrir neðan eftir lesturinn. Þú velur einfaldlega flipann ,,Heiti / vefsíða," skráir þar nafnið þitt og svo getur þú skrifað að vild.